ƏLI NASIR, HEYIF, 
     ƏMƏ PI BIMON
Si sor bənav zındənıbin əməni,
Bəmə tıxlit kardedəbe çəməni
“Güya tolış hiç bə dınyo omə ni”,
Məqər əmə səfi bimon, vi bimon?

Əli Nasir, heyif, əmə pi bimon.

Bo həxero dəşimon bə hərəkət,
Xəlvət-oşko obe çanə mərəkə.
Yolə Xıdo doşe xeyır- bərəkət,
Oxo əmə deştə Xıdo i bimon.

Əli Nasir , heyif, əmə pi bimon.
Tolış bey-bey votedəbin: əv tı niş,
Noxod tı niş , qandım tı niş, cəv tı niş.
Maholədə çı hiçkəsi qəv tı niş,
Bo cokəson porsanq bimon, qi bimon.
Əli Nasir, heyif, əmə pi bimon.

Keynə olət takardıme tirmədə,
Votoşone: ıştəni bə qir mədə”.
Zumand bimon hıte-hıte turmədə,
Hiçki bimon. ısət yolə Ki bimon.
Əli Nasir, heyıf, əmə pi bimon.

Dınyo ısət zınedə ki, hestimon,
Çanə millət heste, dəvon dustimon.
Həxı tono hejo əmə rostimon,
Naveyədə nəzərondə ni bimon,
Əli Nasir , heyıf, əmə pi bimon.

Pidəşon ni çı tolışon ico be , 
Sərfe bəvon məxloğati co-co be.
Şeytonqəvən hejo çəmə dıço be,
Məqər əmə ico beku si bimon?
Əli Nasir, heyıf, əmə pi bimon.

Pebəpuşe, ki roədə tərs bıbo, 
Həxe vədə bəlarze lap hırs bıbo.
Çəmə şə ro bo cıvonon dərs bıbo,
Bəznen əmə sa sor bənav ki bimon.
Əli Nasir, heyıf, əmə pi bimon.

De ğələmi, de şeri canq bıkəmon!
Deştə mahne ha sehri çanq bıkəmon.
Bo deşmoni har toni tanq bıkəmon,
Nıvotın ki, boçi joqo di bimon,
Əli Nasir, heyıf, əmə pi bimon.

Deştə nomi bəne merdi mandimon,
Daveyədə faş be, sute çan dimon.
Deştə i be ımruj barzə bandimon,
Zınəkəs ni, çoko be ki, i bimon,
Əli Nasir, heyıf, əmə pi bimon.

Bo ki bılbıl, bo ki hələ ğəjemon,
Oməmon ki, ruji çıyo bəşemon,
Umu kardəm xalqi dıldə bəjimon,
Arədəmon peydo nıbo beimon,
Əli Nasir, heyıf, əmə pi bimon.

Iştə piyə lıvemono rostimon,
Çok famedən, tike-poə ne, dıstimon.
Dalarzənən, zınedən ki, hestimon,
Umjən bedə bəmə çanə “işpion”,
Əli Nasir, heyıf, əmə pi bimon.

Peydo bedə çanə ara bıjənon,
Bə cıvonon yəxə darzən pejənon.
Pidəşone bısutin ın bejənon,
Joqo nıznon, həmə kumon, korimon.
Əli Nasir, heyıf, əmə pi bimon.

Qırdo-kəno tanq be bəmə bəvədə...
Orəxəmon çə zılmotə şəvədə.
Əzbərimon həni dınyo qəvədə,
Bo tarıxi lap dorozə ji bimon.
Əli Nasir, heyıf, əmə pi bimon.

Çiçimon hıst-həmə ənə dimədəy,
Nimə həmoy, nimə bande, nimə dəy.
Tolışi ko əmandıni nimədə!
Çokimonən , bədimonən-ımimon.
Əli Nasir, heyıf, əmə pi bimon

Xanəli Tolış,
25 aprel-1 may 2014